Mark Hughes, knattspyrnustjóri QPR, hefur verið rekinn úr starfi en félagið staðfesti þetta í dag.
QPR er án sigurs á botni ensku úrvalsdeildarinnar þrátt fyrir að Hughes hafi verið duglegur að fá leikmenn til sín síðastliðið sumar.
Eftir 3-1 tap gegn Southampton um síðustu helgi var talið að Hughes myndi missa starfið og nú hefur það verið staðfest.
Mark Bowen og Eddie Niedzwiecki hafa tekið tímabundið við QPR en þeir munu stýra liðinu í leiknum gegn Manchester United á morgun.
Harry Redknapp, fyrrum stjóri Tottenham, hefur langmest verið orðaður við stjórastöðuna hjá QPR að undanförnu en hann hefur ekki verið í stjórastarfi síðan hann yfirgaf Spurs í sumar.
Athugasemdir
