Kyle Bartley fékk tækifæri í byrjunarliði Swansea í dag þegar liðið heimsótti Blackburn í 4.umferð ensku bikarkeppninnar. Hann entist þó aðeins í sex mínútur en hann fékk beint rautt spjald og þurftu gestirnir að spila stærstan hluta leiksins einum færri.

Gylfi Þór Sigurðsson var í byrjunarliði Swansea og kom þeim yfir með stórglæsilegu marki á 21.mínútu. Forystan entist ekki lengi því Chris Taylor jafnaði metin nokkrum sekúndum síðar.

Hinn stóri og stæðilegi, Rudy Gestede, kom heimamönnum í 2-1 á 78.mínútu en kappinn sá hefur verið orðaður við nokkur úrvalsdeildarfélög upp á síðkastið. Svanirnir frá Wales reyndu hvað þeir gátu að jafna leikinn en Craig Conway innsiglaði góðan sigur heimamanna með marki í uppbótartíma.

Gylfi lét svo reka sig af velli á lokaandartökum leiksins og enduðu Swansea því níu á móti ellefu.