„Ég held að það sé alveg ljóst að hann missir af fyrstu umferðunum," segir Sigurður Ragnar Ejólfsson, þjálfari ÍBV, um meiðsli hægri bakvarðarins Arnórs Eyvars Ólafssonar.
Arnór er hlekkur í hinni gríðarlega öflugu vörn Eyjaliðsins.
Arnór er hlekkur í hinni gríðarlega öflugu vörn Eyjaliðsins.
„Við höldum að hann sé með það sem kallast „Sports Hernia". Við héldum fyrst að þetta væri tognun í nára en þetta er líka eitthvað sem er í kviðveggnum þannig að hann á tíma hjá sérfræðingi," segir Sigurður.
„Hann hefur farið í ómun og verið hjá sjúkraþjálfara og bæklunarlækni. Hann er að bíða eftir því að fá tíma hjá Sigurði Blöndal hjá Domus Medica sem er okkar helsti sérfræðingur í þessu."
„Ef hann þarf að fara í aðgerð þá eru það alltaf 5-6 vikur held ég að lágmarki í viðbót. Hann er þegar búinn að vera frá í einn mánuð rúman. Hann getur ekki skokkað ennþá þrátt fyrir að hafa gert margar æfingar og verið í sjúkraþjálfun í mánuð. Það segir manni að þetta er meira en tognun í nára."
ÍBV endaði í sjötta sæti Pepsi-deildarinnar í fyrra en liðið mætir Fram í 1. umferðinni þetta árið þann 4. maí.
Athugasemdir