Margrét Lára Viðarsdóttir skoraði eina mark Vals í 1-0 sigri gegn uppeldisfélagi sínu ÍBV í Pepsi-deild kvenna í kvöld. Hún var að vonum ánægð með sigurinn.
„Eins og flestir vita erum við búin að gera tvö jafntefli, tveir erfiðir leikir og þessi var ekki síður erfiður en hinir tveir og við erum afskaplega ánægð með þrjú stig héðan úr eyjum. Þetta var þvílíkur baráttusigur, sigur fyrir þjálfarana. Liðið var mikið breytt frá því í fyrstu tveimur leikjunum og mér fannst þetta heppnast fullkomlega," sagði Margrét Lára eftir leikinn. Hún viðurkennir að það hafi tekið eilítið á að spila gegn uppeldisfélaginu.
„Það er alltaf svolítið erfitt og stelpur sem maður hefur verið með í knattspyrnuskólum hérna heima. Það er alltaf gaman að koma heim og hvergi betra en að spila á Hásteinsvelli. Það er alltaf sætt að skora en stundum skorar maður ekki og maður vinnur, þetta snýst um að vinna og markið er bónus."
Athugasemdir
