Við höldum áfram að útnefna Dirty-leikmann vikunnar í samstarfi við Dirty Burger & Ribs í sumar.
Í þessari viku verður brotið blað í sögu Dirty-leikmanns vikunnar þar sem þessi vafasama nafnbót fellur í fyrsta skipti í hlut konu.
Fjölnir, sem leikur í þriðju efstu deild, sló í gær nokkuð óvænt út 1. deildar lið Keflavíkur í Borgunarbikar-kvenna. En við erum ekki mikið að spá í því hérna í Dirty-leikmanns deild Fótbolta.net. Það sem vakti athygli okkar var framganga Hlínar Heiðarsdóttur, leikmanns Fjölnis, en hún greip til þess fantabragðs að rífa í sítt og mikið hár Anítu Lindar Daníelsdóttur, leikmanns Keflavíkur, til að stoppa skyndisókn Suðurnesjastúlkna.
Hlín hlaut aðeins gult spjald fyrir athæfið en margir vilja meina að rautt hefði verið við hæfi og á meðal þeirra er fyrrum stjörnudómari Íslands, Kristinn Jakobsson. Sitt sýnist hverjum en það er hinsvegar alveg ljóst að Hlín er Dirty-leikmaður vikunnar hér á Fótbolti.net.
Fórnarlamb Hlínar, hún Aníta, á inni máltíð að eigin vali hjá Dirty Burger & Ribs þar sem hún getur sleikt sárin og jafnað sig bæði á brotinu og tapinu.
Myndband af atvikinu má sjá hér fyrir neðan.
Fimm leikjum lauk í kvöld í bikarkeppni kvenna. Það var heldur betur hart barist í Grafarvogi! Fleiri tilþrif hér: https://t.co/1PrL3bXJtq pic.twitter.com/tvUsyuSCuD
— RÚV Íþróttir (@ruvithrottir) May 23, 2017
Athugasemdir