Biglia var nýbúinn að ná sér eftir slæm bakmeiðsli þegar Atalanta og Milan áttust við í næstsíðasta leik tímabilsins á Ítalíu.

Gomez vissi vel af meiðslunum en tæklaði samlanda sinn harkalega og óþarflega í leiknum.

„Ég vissi af honum á bakvið mig og þess vegna var ég svona reiður. Ég bjóst við að hann myndi biðjast afsökunar á vellinum eða beint eftir leikinn en hann gerði það ekki," sagði Biglia hneykslaður.

Papu baðst afsökunar á Instagram en Biglia gefur lítið fyrir þá afsökun.

„Ég horfi fram á veginn núna en við erum ekki vinir. Við spilum fyrir sama landslið og ekkert annað. Ég nota ekki samfélagsmiðla svo þessi afsökunarbeiðni gerir lítið fyrir mig.

„Til samanburðar þá bað Benevento leikmaðurinn sem meiddi mig til að byrja með afsökunar. Hann kom síðan að hitta mig á spítalanum.

„Ég var svo reiður því ég fann fyrir miklum sársauka eftir tæklinguna og var smeykur um að missa af HM. Eftir leikinn fór ég heim og æfði með sjúkraþjálfaranum til fimm um morguninn."