"Við byrjuðum leikinn ágætlega en við fengum tvö mörk eftir 12 mínútur. Þá var mjög erfitt að koma til baka," sagði Ejub Purisevic, þjálfari Víkings Ó. eftir 2-0 tap gegn Víkingi R. í kvöld.
Lestu um leikinn: Víkingur R. 2 - 0 Víkingur Ó.
Fyrra markið kom úr víti sem Ólsarar voru ekki ánægðir með.
"Þetta var mjög soft víti og ég var mjög hissa þegar hann dæmdi vítið. Þetta var stór ákvörðun,"
Þá voru Ólafsvíkurdrengir á því að þeir hefðu átt að fá víti í seinni hálfleiknum. "Ég vil sjá aftur hvort við hefðum átt að fá víti.. Þetta er í þriðja sinn sem hann dæmir hjá okkur og í leiknum gegn Breiðablik áttum við að fá tvær vítaspyrnur en hann dæmdi ekkert."
Hann viðurkennir fúslega að liðið hafi oft spilað betur en í kvöld.
"Já við höfum oft spilað betur. Eftir að við lentum undir var erfitt að koma til baka. Við áttum gott færi í seinni hálfleiknum og ef við hefðum skorað hefði það kannski breytt leiknum."
Gísli Eyjólfsson hefur verið á láni hjá Ólsurum frá Breiðablik en var kallaður til baka í gær. Ejub segir að það hafi riðlað skipulaginu.
"Auðvitað riðlaði það leikskipulaginu. Það var planið alla vikuna að hann myndi byrja leikinn og við undirbjuggum okkur þannig en allt í einu þurftum við að breyta. Við erum með lítinn hóp og þessir hlutir hafa áhrif."
Þá ræddum við um framhaldið í deildinni."Ég hef alltaf sagt að það sé kraftaverk að halda sér í deildinni. Ef einhver heldur að það sé hægt að gera betur væri ég til í að sjá það. Þetta er enginn heimsendir, við höldum áfram og vonandi höldum við sæti okkar í deildinni. "
Athugasemdir