Borgunarbikar kvenna: Selfoss í úrslitin í fyrsta sinn

Selfoss er komið í bikarúrslit í fyrsta sinn í sögunni eftir sigur á Fylki á útivelli þar sem úrslitin réðust í vítaspyrnukeppni.

Stemningin í Lautinni var mikil enda leikurinn afar fjörugur og skiptust liðin á að skora.

Blake Ashley Stockton gerði bæði mörk Selfoss í leiknum, en Fylkisstúlkum tókst í tvígang að jafna metin. Carys Hawkins og Anna Björg Björnsdóttir gerðu mörk Fylkis.Staðan var 2-2 að loknum venjulegum leiktía og því var framlengt.

Í framlengingu fengu bæði lið færi til að skora sigurmarkið í leiknum, en inn vildi boltinn ekki og þurfti því að grípa til vítakeppni.

Í vítakeppninni reyndist Alexa Gaul í marki Selfyssinga hetja Sunnlendinga. Hún varði fyrstu þrár spyrnur Fylkis á meðan Selfyssingar nýttu þrjár af fjórum spyrnum sínum. Skoraði Gaul meðal annars úr sinni spyrnu.

Það kemur í ljós á morgun hver andstæðingur Selfoss verður í úrslitaleiknum í ágúst, en þá mætast Breiðablik og Stjarnan í stórleik.