„Þetta var skrýtinn leikur. Ég var að mörgu leyti ánægður með mitt lið sem er kannski fáránlegt að segja eftir að hafa tapað 3-0," sagði Kristófer Sigurgeirsson eftir tap sinna manna gegn Fram í kvöld.
Lestu um leikinn: Fram 3 - 0 Leiknir R.
Það var fátt sem gerðist fyrsta hálftímann í leiknum og mikið jafnræði var með liðunum en í blálokin á fyrri hálfleiknum fengu Framarar vítaspyrnu en Kristófer var ekki alveg sammála þeim dómi.
„Ég sá þetta eiginlega öfugt, mér fannst eins og hann hafi farið aftan í Ósvald en ég vona að hann hafi haft rétt fyrir sér."
Það voru alls ekki nógu mörg færi sem litu dagsins ljós í þessum leik og var Krisófer á því að liðið hans hafi ekki skapað nógu mikið af almennilegum færum.
„Kannski ekki nógu mikið af almennilegum færum, en sérstaklega í fyrri hálfleik þá vorum við að koma okkur mikið í réttar stöður til þess að komast í almennileg færi og ég er kannski smá svekktur með það að við séum ekki að klára betur."
Leiknismenn eiga leik gegn Íslandsmeisturum FH í undanúrslitunum Borgunarbikarins á laugardaginn og taldi Kristófer að það gæti hafa verið í hausnum á sínum mönnum í dag.
„Auðvitað getur það haft áhrif, þetta er auðvitað eitthvað sem að félagið hefur aldrei farið í áður og kannski er þetta svona aðeins í undirmeðvitundinni."
Athugasemdir