"Ég er mjög sáttur. Við spiluðum mjög vel, sérstaklega í fyrri hálfleik. Það var smá værukærð í seinni hálfleik en heilt yfir er ég virkilega ánægður," sagði Ólafur Brynjólfsson, þjálfari Vals, eftir 4-0 sigur gegn FH í Pepsídeild kvenna í kvöld.
Lestu um leikinn: FH 0 - 4 Valur
Hann segir að Valsliðið hefði getað skorað meira í leiknum. "Við fengum fleiri sem við hefðum átt að nýta betur en stundum er þetta svona. Fjögur mörk eru alveg nóg."
Þá segist Ólafur lofa því að Valsliðin muni halda áfram að pressa á Stjörnuna og Breiðablik sem verma tvö efstu sæti deildarinnar. "Við munum halda pressu á Stjörnunni og Breiðablik alveg til loka mótsins, ég skal lofa þér því. Við ætlum að vinna okkar leiki og setja góða pressu á liðin fyrir ofan okkur."
Næst fær Valsliðið einmitt Stjörnuna í heimsókn. "Það verður skemmtilegt verkefni. Við höfum viku til að undirbúa okkur og við erum á heimavelli. Stjörnustúlkur eru gríðarlega góðar og fengu einhverja átta leikmenn fyrir tímabilið. Þær hafa safnað miklu liði og eru góðar. Það er búið að eyða miklu þarna."
Ólafur var þvínæst spurður hvort hann leyfði sér enn að dreyma um Íslandsmeistaratitilinn. "Ég er þannig að ég gefst ekki upp fyrr en möguleikinn er dauður. Við munum setja pressu á þær alveg út í eitt."
Athugasemdir