Nú er 2. deild karla lokið þetta sumarið. Fimm leikjum var að ljúka og nú er það ljóst fyrir vissu hvaða lið það eru sem eru að fara upp í Inkasso-deildina og hvaða lið það eru sem eru á leiðinni niður í 3. deild karla.

Það var nokkuð um spennu í þessari lokaumferð og sérstaklega þar sem Grótta tapaði nokkuð óvænt gegn Hetti á útivelli. Afturelding hefði getað tekið seinna sætið upp í Inkasso-deildina ef þeir hefðu unnið ÍR-inga, en svo fór ekki, ÍR vann 3-1 sigur og það er því ljóst að það verða ÍR og Grótta sem taka sæti Fjarðabyggðar og Hugins í Inkasso-deildinni að ári.

Ægir vann Magna frá Grenivík með einu marki gegn engu, en það var ekki nóg til að halda sætinu í deildinni. Ægir fellur því niður í 3. deild með botnliði KF.

Njarðvík endaði tímabilið á sigri gegn Vesta á útivelli þar sem Harrison Hanley setti sigurmarkið á 87. mínútu og þá hafði Sindri betur gegn KV í Vesturbænum.

Hér neðst í fréttinni má sjá lokastöðuna í deildinni. Það tekur hana kannsi einhvern tíma að uppfæra sig.