„Þetta var mjög erfið fæðing en við fengum svona helling af sénsum til að búa til dauðafæri en náðum ekki að gera það. En ég hafði á tilfinningunni að við værum alltaf að fara að skora. Að það myndi detta inn eitt,“ sagði Fanndís Friðriksdóttir leikmaður Breiðabliks eftir 2-0 sigur á ÍA.
Lestu um leikinn: Breiðablik 2 - 0 ÍA
Breiðablik hafði mikla yfirburði í leiknum en náði ekki að skora fyrir en undir lok leiksins.
„Mér fannst þetta óvandað hjá okkur á síðasta þriðjungi. Við vorum ekki að velja rétt og sendingarnar voru bara slakar inn í. En það var bara eitt lið á vellinum held ég. Þær fengu nú samt einhver tvö dauðafæri en þá er gott að hafa markmann eins og Sonný sem grípur inn í þegar þess þarf.“
Fanndís er nýkomin úr landsliðsverkefni ásamt nokkrum liðsfélögum sínum og þær sem mest á mæddi virtust þreyttar í dag. Fanndís vildi þó ekkert kvarta og sagðist vera fersk.
„Við fórum sjálfar í endurheimt daginn eftir leik á miðvikudaginn. Svo var frí á fimmtudaginn og æfing í gær þannig að maður er bara ferskur. Ég var orðin smá þreytt þarna í lokin en þetta vill maður. Maður vill spila leiki í staðinn fyrir að æfa.“
Úrslit dagsins þýða að það eru enn tvö stig sem skilja Stjörnuna og Breiðablik að fyrir lokaumferð Íslandsmótsins. Fanndís segir að Blikar einbeiti sér að því að klára sinn leik en vonist auðvitað eftir því að Stjörnunni mistakist að vinna sinn leik.
„Við þurfum bara að klára okkar og sjá hvað það gefur okkur í endann og vonast til að þær misstígi sig en það er ekki sjálfgefið.“
Athugasemdir