„Maður á eftir að fatta þetta betur í kvöld. Maður fær sér kaffi og kleinu og nær að melta þetta aðeins," sagði Haraldur Björnsson, markvörður Stjörnunnar, við Fótbolta.net eftir 2-1 tap gegn Val í dag. Þrátt fyrir tap þá er Stjarnan búið að tryggja Evrópusæti eftir jafntefli hjá Fjölni og KR.
Lestu um leikinn: Stjarnan 1 - 2 Valur
Halli fékk á sig vítaspyrnu í fyrri hálfleik í leiknum í dag. Kristinn Ingi Halldórsson fékk þá fyrirgjöf og kom boltanum í átt að marki framhjá Haraldi sem kom út á móti. Þeir skullu í kjölfarið saman og dæmd var vítaspyrna.
„Ég þarf að sjá þetta aftur. Eins og ég sé þetta þá kem ég ekki á fleygiferð. Ég fæ hann og sólann hans í bringuna á mér. Ég fatta þetta ekki alveg. Mér fannst ég koma út og stoppa."
„Ég hafði ekki hugmynd um að hann væri að dæma á mig. Ég hélt að hann væri að dæma bakhrindingu af því að ég fékk hann yfir mig og sólann í bringuna," sagði Halli og sýndi takkaför á bringunni.
Haraldur er uppalinn Valsari en hann var að mæta gömlu félögunum í dag. Valur landaði Íslandsmeistaratitlinum fyrir viku.
„Ég þekki bróðurpartinn af þessum strákum og óska þeim innilega til hamingju. Ég æfði og spilaði lengi með Bjössa Hreiðars og hann er búinn að standa sig vel sem þjálfari. Ég þekki Óla jó líka og ég óska þeim innilega til hamingju," sagði Halli.
Hér að ofan má sjá viðtalið í heild sinni.
Athugasemdir