Paul Pogba hefur verið mikið í umræðunni frá því að hann kom til Juventus frá Manchester United, en hann virðist einfaldlega ætla að verða betri og betri.

Franski landsliðsmaðurinn hefur gegnt stóru hlutverki hjá Juventus frá upphafi en hann er gersamlega að springa út núna og er orðinn alger lykilmaður.

Pogba var enn og aftur í essinu sínu í 2-0 sigri ítölsku meistaranna gegn Chievo Verona í dag.

Snemma í leiknum fíflaði hann fjóra leikmenn Chievo upp úr skónum með frábærum töktum, og svo skoraði hann fyrra mark Juventus með frábæru skoti.