Iago Aspas, fyrrverandi sóknarmaður Liverpool, gerði bæði mörkin er Celta Vigo lagði Granada að velli í eina leik kvöldsins í spænska boltanum.

Aspas gerði fyrsta mark leiksins snemma úr vítaspyrnu og jafnaði Youssef El Arabi metin um miðjan síðari hálfleik.

Aspas var þó snöggur að svara og kom heimamönnum yfir á nýjan leik á 76. mínútu.

Fallbaráttulið Granada sótti á lokakaflanum en tókst ekki að jafna og sigur Celta staðreynd. Celta er í 5. sæti deildarinnar, sem gefur þátttökurétt í riðlakeppni Evrópudeildarinnar, þegar þrjár umferðir eru eftir af tímabilinu.