Þór/KA konur unnu mjög góðan 3-1 sigur á ÍBV á Þórsvelli í dag. Donni, þjálfari Þór/KA var ánægður með sigurinn en liðið er með fullt hús stiga eftir 6 umferðir. Þriðjungur búinn af mótinu og þær sitja einar í toppsætinu.
Lestu um leikinn: Þór/KA 3 - 1 ÍBV
„Leikurinn spilaðist bara eins og við ætluðum okkur í rauninni. Þetta voru náttúrulega tvö mjög góð lið, lið sem spila sama kerfi og ferskt að mæta slíku. Tvö lið sem vildu reyna að vinna og við höfðum yfirhöndina. Það voru föstu leikatriðin sem skildu að.,“ voru fyrstu viðbrögð Donna við sigrinum.
Í næsta leik heimsækir Þór/KA lið Stjörnunnar en þessi tvö lið eru þau einu sem ekki hafa tapað leik hingað til. Sannkallaður toppslagur.
„Við munum spila okkar leik áfram, það er búið að ganga ágætlega hingað til. Við höldum okkar striki og svo kemur svosem bara í ljós hvað verður í leiknum. Þá er allskonar plan, A, B, C og D og við reynum að bregðast við því. En við viljum bara vinna,” sagði Donni um komandi toppslag.
„Ég er ótrúlega ánægður með það hversu frábærlega var mætt hér í dag. Klárlega besta stuðningsliðið í þessari deild. Frábærir stuðningsmenn enda er kannski árangurinn eftir því og ég vil nota tækifærið og þakka fólkinu fyrir stuðninginn í dag, við hefðum ekki getað gert þetta án þeirra,” voru lokaorð Donna.
Allt viðtalið má svo sjá hér að ofanverðu.
Athugasemdir