Erna Guðrún Magnúsdóttir fyrirliði FH var vonsvikin eftir 3-1 tap gegn Stjörnunni í 6. umferð Pepsi-deildar kvenna í kvöld.
Lestu um leikinn: FH 1 - 3 Stjarnan
„Mér finnst við eiga meira skilið úr leiknum. Seinni hálfleikurinn var virkilega góður hjá okkur. Þetta voru svolítið klaufaleg mörk sem við fengum á okkur og eigum að fá víti í fyrri hálfleik. Þannig við erum alveg inn í þessum leik."
Í stöðunni 2-1 fyrir Stjörnunni vildu FH-stelpur fá vítaspyrnu. Erna Guðrún er alveg handviss um að boltinn hafi farið í höndina á leikmanni Stjörnunnar.
„Þetta var klárt víti. Og þetta hafði áhrif á leikinn, við hefðum verið inn í leiknum þarna."
FH-liðið er að glíma við töluverð meiðsli þessa dagana. Einungis fimm varamenn voru á skýrslu hjá FH í kvöld, þar af tveir markmenn.
„Við erum með efnilegar stelpur á bekknum sem geta komið inn í svona leik," sagði Erna en FH mætir Grindavík í næstu umferð.
„Það er sex stiga leikur. Grindavík er lið sem við eigum að vera berjast við á botninum. Þetta verður gríðarlega mikilvægur leikur."
Í marki FH stendur Lindsey Harris sem var stórkostleg í markinu í kvöld og hefur verið það í allt sumar. Erna er ánægð með hvernig Harris hefur komið inní liðið í sumar.
„Hún er virkilega góð. Hún er kletturinn okkar. Hún talar mikið og kemur vel inn í liðið hjá okkur," sagði fyrirliði FH, Erna Guðrún Magnúsdóttir að lokum.
Viðtalið í heild sinni má sjá í sjónvarpinu hér að ofan.
Athugasemdir