Það voru tveir leikir spilaðir í dag í 4. deild karla og er þeim báðum lokið.

Ýmir skaust á toppinn í A-riðli með sigri á botnliði Harðar frá Ísafirði.

Ýmismenn komust í 2-0, en Hörður kom til baka og náði að jafna 2-2. Það dugði hins vegar ekki því Ýmir svaraði með tveimur mörkum. Í stöðunni 4-2 náði Hörður að minnka muninn, en aftur svaraði Ýmir og lokatölur urðu 5-3 í þessum leik í Fagralundi.

Það var einnig leikið í C-riðlinum þar sem Geisli úr Aðaldal fékk Hvíta Riddarann í heimsókn.

Haukur Eyþórsson var í stuði og setti þrennu og kom Hvíta Riddararnum í 3-0 og Fannar Freyr Ásgeirsson setti svo fjórða markið áður en Geisli minnkaði muninn. Guðmundur Kristinn Pálsson skoraði fimmta mark Hvíta Riddarans og þar við sat. Hvíti Riddarinn er enn ósigraður, en í 2. sæti C-riðils á eftir Létti.