Nýliðarnir í RB Leipzig halda áfram að koma á óvart í þýsku Bundesligunni, en þeir náðu í kvöld sex stiga forystu á toppi deildarinnar með sigri á Freiburg á útivelli. Þessi föstudagsleikur var sá fyrsti í 12. umferð deildarinnar.

Orkudrykkjarpiltarnir í RB Leipzig byrjuðu gríðarlega vel og þeir komust yfir eftir aðeins tvær mínútur þegar miðjumaðurinn Naby Keita kom boltanum netið, 1-0 fyrir getstina frá Leipzig.

Þessi forysta entist þó ekki mjög lengi þar sem Florian Niederlechner jafnaði fyrir Freiburg á 15. mínútu leiksins. Sóknarmaðurinn Timo Werner sá hins vegar til þess að gestirnir færu með forystuna inn í leikhléð og hann gerði sér lítið fyrir og setti tvö mörk og staðan var 3-1 þegar dómarinn flautaði til hálfleiks.

Austurríkismaðurinn Marcel Sabitzer kláraði svo leikinn endanlega fyrir RB Leipzig, sem eru mikilli siglingu í þýska boltanum. Nú er staða þeirra mjög góð.

Lið Leipzig er áfram taplaust og þeir sem nýliðar eru á toppi deildarinnar, núna með sex stiga forskot á risana í Bayern München. Bayern á leik til góða gegn Bayer Leverkusen á morgun. Freiburg er í tíunda sæti með 15 stig.

Hér að neðan má sjá stöðutöfluna í deildinni, en það gæti tekið smá tíma fyrir hana að uppfæra sig.