„Þetta var niðurlægjandi, veikt og aumkunarvert. Þetta var svo sannarlega verðskuldað tap," segir Bernt Hulsker sem er sérfræðingur norska sjónvarpsins. Hann sagði að Noregur hafi litið betur út í seinni hálfleik því norður-írska liðið hefði slakað á.

Varnarleikur norska liðsins fær mikla gagnrýni í norskum fjölmiðlum en Hulsker segir að sóknarleikurinn hafi ekki verið skárri, þar hafi ekki verið neitt að frétta.

Eins og við var búist lék Lagerback með 4-4-2 leikkerfi eins og hann er þekktur fyrir en frammistaða Noregs var ekkert í líkingu við það sem hann náði út úr íslenska landsliðinu.

Lagerback sagði sjálfur í viðtölum eftir leik að ábyrgðin væri hans. „Ég ber ábyrgð á því að menn mæti með rétt hugarfar inn á völlinn," sagði Lagerback í viðtali eftir leik.

Lagerback er gagnrýndur af norskum sparkspekingum fyrir að hafa farið inn í leikinn, leik sem Noregur varð að vinna, með of varnarsinnað leikkerfi. Verdens Gang gefur Lagerback 4 af 10 í einkunn eftir leikinn í einkunnagjöf sinni.

Nettavisen býður upp á stóra fyrirsögn þar sem auglýst er eftir karakter í norska landsliðinu, einhverjum sem er með norskt hjarta. Þá er talað um „martraðarbyrjun" hjá Lagerback.

Ljóst er að möguleikar Noregs á að komast á HM eru úr sögunni. Litið verður á þá leiki sem eftir eru í undankeppninni sem undirbúningsleiki fyrir næstu undankeppni þegar Lagerback freistar þess að koma Noregi á EM 2020.