„Perú er mun sterkari andstæðingur heldur en Mexíkó en við ætlum að halda okkar striki og gefa mönnum tækifæri á að sýna sig og sanna og stimpla sig inn í þennan hóp sem við ætlum að velja fyrir næsta leik," sagði Heimir.

„Þetta er síðasti séns og þið vitið að umhverfið hjá landsliðum í Evrópu því vináttulandsleikir munu heyra sögunni til og tilraunir verða erfiðari í framtíðinni. Hver fer því að verða síðastur til að gefa mönnum tækifæri á að sýna sig og fá reynslu. við ætlum að nýta okkur það hvort sem við séum að taka fleiri sénsa en ella. Við einblínum frekar á það sem við ætluðum að gera heldur en endilega úrslitin, þó það sé ömurlegt að segja það eftir 3-0 tap."

Rúnar Alex Rúnarsson spilaði allan leikinn í marki Íslands gegn Mexíkó en mátti lesa í þá stöðu þannig að hann sé orðinn annar markvörður liðsins á eftir Hannesi Þór Halldórssyni?

„Nei, við máttum rýna í að Rúnar hefur ekki fengið marga leiki með okkur og hann þarf að fá leiki með okkur, bæði svo við sjáum hann með þessum leikmönnum sem hafa verið mest í byrjunarliðinu og að sjá hann í leik gegn mjög sterkum andstæðingum," svaraði Heimir og hélt áfram.

„Hann hefur verið að spila janúar leikina með okkur og við vildum gefa honum þetta tækifæri núna og það er sama með Albert Guðmundsson og Samúel Kára Friðjónsson. Við vildum sjá þá með þessu liði gegn sterkum andstæðingum því það er erfitt að dæma menn gegn liðum eins og Indonesíu þegar við fórum í það verkefni."

Albert Guðmundsson leikmaður PSV Eindhoven í Hollandi stóð sig mjög vel í Indonesíu og ljóst að þjóðin er spennt fyrir honum til framtíðar. Hann byrjaði leikinnn gegn Mexíkó en tókst honum að sýna Heimi það sem hann vildi fá út úr honum?

„Hann spilaði taktíst í þessum leik við vitum alveg hvað hann getur sóknarlega. Hann er leikmaður sem hefur ákveðna sóknarhæfileika og einstaklingshæfileika. Íslendingar eiga ekki mikið af þannig leikmönnum en til að komast í lokahóp HM verður hann að geta spilað leikaðferðina okkar og taktíkina okkar og mér fannst hann skila því vel í leiknum gegn Mexíkó."

Kolbeinn Sigþórsson var óvænt með í hópnum sem fór til Bandaríkjanna en hann hefur verið að koma til baka með varaliði Nantes eftir tveggja ára fjarveru vegna meiðsla. Hann er farinn til Frakklands að nýju núna og verður ekki með gegn Perú.

„,Við erum búnir að sjá það sem við vildum sjá, hann er á hárréttri leið. Hann, Jón Daði, Aron Einar og U21 árs strákarnir eru farnir heim því okkur fannst ekki taka því að halda þeim þremur hér því það er bara létt taktísk æfing í dag og leikdagur á morgun. Þá finnst okkur mikilvægara að þeir fari til síns félags og reyni allir þrír að ná leikjum helgarinnar. Þeir ættu allir að vera líklegir til að ná leik um helgina. Ég hefði getað spilað Kolbeini eitthvað á morgun en það var ekki tilgangurinn með þessu. Heldur bara að sjá hann í hópnum og hvar hann er staddur í fitness. Þó hann hefði spilað 10-15 mínútur breytir litlu fyrir okkur. Nú þarf hann bara að koma sér í liðið hjá sínu félagi. Ef það gerist þá munum við fylgjast með honum þar."

Útlitið á Heimi í Bandaríkjaferðinni hefur vakið athygli enda er kallinn farinn að safna sjaldséðu skeggi.

„Það er bara búið að vera svo mikið að gera að ég hef ekki nennt að raka mig," sagði Heimir og hló. „Ég vissi líka að það yrði kalt hérna og þá er allt í lagi að breyta til."

Nánar er rætt við Heimi í sjónvarpinu hér að ofan en þar byrjar hann á að gera upp 3-0 tapið gegn Mexíkó í Kaliforníu aðfaranótt laugardagsins.