„Nei, eiginlega ekki. Okkur hefur alltaf verið spáð lélegu gengi síðustu 3-4 árin. Svo að þetta er bara eins og venjulega," sagði Brynjar við Fótbolta.net.

Huginn vann 2. deildina í fyrra eftir að hafa verið spáð 10. sæti fyrri tímabilið. Hvert er markmiðið í sumar, þegar liðið spilar deild ofar.

„Markmiðið er að vera með lið sem veitir öllum liðum í deildinni keppni," sagði Brynjar.

Seyðfirðingar hafa verið rólegir á leikmannamarkaðinum í vetur en Ivan Eduardo Nobrega Silva, frá Portúgal, er eini nýi leikmaðurinn sem er kominn til félagsins síðan í fyrra.

„Það er alltaf erfitt að finna leikmenn sem styrkja liðið. En við verðum með flott lið hvernig sem að það fer," sagði Brynjar en möguleiki er á að Huginn fái frekari liðsstyrk áður en mótið hefst.

Í fyrra neyddist Huginn til að spila meirihluta sinna heimaleikja á Fellavelli vegna bleytu á Seyðisfjarðarvelli. Vonir standa til að fleiri heimaleikir verði á Seyðisfirði í sumar.

„Það er bara verið að vinna í einhverjum úrbætum eins og efni standa til. Svo verður bara bongó blíða á Seyðis í sumar og þá verður þetta ekkert vandamál," sagði Brynjar léttur að lokum.