Það verða ekki spilaðir endurteknir leikir í 8-liða úrslitum enska FA-bikarsins frá og með næsta tímabili, en enska knattspyrnusambandið greinir frá þessu.
Þessi tillaga var samþykkt af stjórn knattspyrnusambandsins í dag, en þegar komið verður fram í 8-liða úrslitin verður aðeins spilaður einn leikur. Farið verður í framlengingu og svo vítakeppni ef þess þarf.
Þessi breyting er aðallega gerð til þess að létta á leikjaálagi og Martin Glenn, framkvæmdastjóri enska knattspyrnusambandsins, er ánægður með breytinguna.
„FA-bikarinn er enn í hjarta enska boltans og þessi breyting eykur spennuna í keppninni og gagnast leiknum í stærra samhengi," sagði Glenn.
„Það var mætt vel á leiki og horft mikið í sjónvarpinu og það sýnir bara hversu sérstök þessi keppni er. Það var svo undirstrikað með frábærum sögum sem náðu hámarki með sigri Man. Utd á laugardaginn."
„Þó við virðum hefðina og söguna sem hefur myndast, þá mun þessi nýja þróun hjálpa bikarnum að halda stöðu sinni sem þessi elskaða og heimsþekkta keppni."
Athugasemdir