Í kringum aldamótin 2000 fékk Atletico skjal í hendurnar þess efnis að Cristiano Ronaldo og Ricardo Quaresma væru á leiðinni til félagsins, en þetta segir í ævisögu Jorge Mendes, umboðsmanns Ronaldo.

Skjalið var í höndum Jesus Gil, fyrrum forseta Atletico, og samkvæmt því átti Ronaldo að ganga í raðir félgsins frá Sporting Lisbon í Portúgal.

„Faðir minn átti skjal frá milliliði og samkvæmt því áttu Quaresma og Ronaldo að koma til Atletico. Skjalið var undirritað," sagði Miguel Angel Gil Marin, forstjóri Atletico, í bókinni.

„Cristiano var líklegast 15 eða 16 ára. Þetta var skjal frá milliliði sem hafði vald til þess að koma leikmanninum frá Sporting til Atletico."

Það varð þó ekkert af þessu og Ronaldo fór til Manchester United frá Sporting árið 2003. Þaðan fór hann til Real árið 2009 fyrir metfé.