Malen, Maguire, Rashford, Greenwood, Yoro, Eriksen og fleiri góðir í slúðri dagsins
banner
   fös 26. maí 2017 11:00
Magnús Már Einarsson
Vill að liðum í Pepsi-deild kvenna verði fækkað í sex
Jón Páll Pálmason.
Jón Páll Pálmason.
Mynd: Fótbolti.net - Einar Ásgeirsson
Úr leik í Pepsi-deild kvenna.
Úr leik í Pepsi-deild kvenna.
Mynd: Fótbolti.net - J.L.
Jón Páll Pálmason birtir í dag áhugaverðan pistil á Facebook síðu sinni. Jón Páll þjálfar í dag karlalið Stord í norsku 3. deildinni eftir að hafa þjálfað Klepp í úrvalsdeild kvenna undanfarin ár. Þar áður þjálfaði Jón Páll lið Fylkis í Pepsi-deild kvenna.

Jón Páll vill meina að keppni í Pepsi-deild kvenna sé alltof ójöfn og að fækka eigi liðunum niður í sex. Hér að neðan má sjá þennan áhugaverða pistil.

Pistill Jóns Páls
Í gær kláraðist 6.umferð pepsideildar kvenna. Þriðjungur mótsins hefur verið leikinn og línur farnar að skýrast. Sú mýta hefur verið í umræðunni undanfarið að deildin sé mun jafnari, meira spennandi og betri en hún var áður.

Eftir þessar 6 fyrstu umferðir þá eru nokkrar staðreyndir komnar á yfirborðið sem ekki er hægt að véfengja:
• Engin óvænt úrslit hafa litið dagsins ljós í mótinu.
• 30% leikja hafa endað með 3 marka sigri eða meira.
• 40% liðanna hafa skorað minna en mark að meðaltali í leik.
Mín skoðun er sú að það verði að fækka liðum í deildinni. Helst niður í 6 lið. Spila þá fjórfalda umferð. Liðið sem lendir í neðsta sæti spilar svo umspil leiki við liðið sem vinnur 1.deild um hvort liðið leiki í efstu deild árið eftir.

Bestu leikmenn pepsideildarinnar spila 18 leiki í deild á ári í dag. Þær komast í gegnum 8 af þessum 18 leikjum á 80% tempó-i. Þær fá í besta falli 10 deildarleiki á ári þar sem þær verða að vera klárar.

Með því að spila fjórfalda umferð þar sem allir leikir eru mun erfiðari en í dag þá bæta bestu leikmennirnir okkar sig og þar af leiðandi landsliðið í leiðinni. Liðin sem ekki eru pepsideildarlið í dag myndu í leiðinni fá mun fleiri leiki í sterkari 1.deild sem væri á jafnréttisgrundvelli.

Að mínu mati þá er deildarfyrirkomulagið þannig í dag að það sé gert fyrir meðalleikmanninn. Ísland hefur náð frábærum árangri með því að komast á EM 2x í röð en það er alls ekki sjálfsgefið að svo verði áfram.

Einn af styrkleikum Íslands er að eyjan er fámenn og það ætti að vera auðvelt að breyta fyrirkomulaginu með skjótum hætti til að tryggja að bestu leikmennirnir okkar fái verðug verkefni í hverri viku, ekki 1-2x í mánuði. Það er nefninlega þannig að það er ekki eins auðvelt að vera atvinnumaður í fótbolta sértu stelpa eins og strákur. Það er alvöru hark fyrir stelpurnar að fara í mennskuna.
Það er nánast ómögulegt að láta félögin ráða fyrirkomulaginu. Að mínu mati ber knattspyrnusambandinu að setja saman hóp eftir EM í sumar þar sem verða allir landsliðsþjálfarar á vegum sambandsins auk fyrrum leikmanna landsliðsins. Þessi hópur gæti þá komið með 2-3 tillögur fyrir næsta þing þannig að mögulegt verið að grípa í taumana.
Íslendingar eiga ekki að sætta sig við meðalmennsku.



Athugasemdir
banner
banner
banner
banner