Jürgen Klopp hefur staðfest að meiðsli Mohamed Salah, sem hann hlaut í úrslitaleik Meistaradeildarinnar í kvöld, séu alvarleg.

„Þetta eru alvarleg meiðsli. Mjög alvarleg meiðsli. Hann er á spítala á leið í röntgen myndatöku. Það er annaðhvort viðbeinið eða öxlin sjálf. Þetta lítur ekki vel út."

Stuðningsmenn Liverpool og Egyptalands bíða eflaust stressaðir eftir frekari fréttum þar sem óttast er að leikmaðurinn missi af HM í Rússlandi í sumar.

Salah hefur þrjár vikur til að verða tilbúinn fyrir Heimsmeistaramótið þar sem Egyptaland er í A-riðli með heimamönnum í Rússlandi, Úrúgvæ og Sádí-Arabíu.