Roy Hodgson, landsliðsþjálfari Englands, segir að löngu innköstin frá Aroni Einari Gunnarssyni séu mikið vopn fyrir Ísland.
Leikur Englands og Íslands í 16-liða úrslitum á EM í Frakklandi fer fram í Nice annað kvöld og Hodgson hefur áhyggjur af löngu innköstunum hjá Aronii.
„Þú verður að vera hálfblindur til að skilja það ekki að (Aron Einar) Gunnarsson er vopn í þeirra höndum," sagði Hodgson.
„Hann kastar ekki aðeins inn á vítateiginn, hann tekur líka innköst í eigin horni og reynir að kasta boltanum upp að miðju vallarins. Svo þetta er það sem við þurfum að vara okkur á og munum undirbúa okkur fyrir."
Ísland skoraði eftir innkast gegn Austurríki og Hodgson segir að menn verði að vinna heimavinnuna sína ef ekki á illa að fara.
„Ef við vinnum ekki heimavinnuna okkar almennilega og erum ekki rétt staðsettir og vinnum ekki einvígin í teignum, þá munu innköstin vera stórt tækifæri fyrir þá til að skora aftur."
„Ég vil halda það að við séum undir allt búnir í rauninni, þegar kemur að andstæðingum okkar."
Athugasemdir