„Við erum að reyna að sigta út leikmenn sem gætu verið framtíðar landsliðsmenn og það er alltaf erfitt," sagði Eyjólfur Sverrisson þjálfari U21 árs landsliðs Íslands við Fótbolta.net eftir að hann tilkynnti hópinn sem mætir Frakklandi og Norður-Írlandi í undankeppni EM í byrjun næsta mánaðar.
Björgvin Stefánsson, markahæsti leikmaður 1. deildar, er í hópnum sem og Viktor Jónsson og Ævar Ingi Jóhannesson sem leika einnig í 1. deild. Eyjólfur hefur þjálfað U21 árs landsliðið frá því árið 2009 en í þessari undankeppni hefur hann í fyrsta skipti valið leikmenn úr 1. deild í hópinn. Af hverju er sú breyting?
„Það eru leikmenn þarna sem eru virkilega góðir. Það eru kannski færri leikmenn í efstu deild með fastan leiktíma. Mér er alveg sama hvar þeir spila. Við horfum á getuna og það er það sem skiptir máli."
Franska U21 árs landsliðið er öflugt og Eyjólfur reiknar með hörkuleik í Kópavogi laugardaginn 5. september næstkomandi.
„Leikurinn á móti Frökkum verður gríðarlega erfiður. Við erum að spila á móti mönnum sem spila með Athletic Bilbao, West Ham og liðum í frönsku deildinni. Við vitum að það verður á brattann að sækja. Við unnum samt Þjóðverja 4-1 í Kaplakrika á sínum tíma og margir úr því þýska liði eru heimsmeistarar í dag."
„Það er alltaf möguleiki og menn verða að hafa trú á því sem er framundan. Við þurfum að sýna þessum strákum að þeir geta orðið heimsklassa leikmenn. Í A-landsliðinu í dag eru margir strákar sem við unnum með í gamla daga og það er gaman að sjá að íslensk knattspyrna er í sókn."
Eyjólfur segist ekki búast við að árangur í 2. sæti í riðli Íslands dugi í undankeppninni að þessu sinni.
„Við verðum væntanlega bara að vinna riðilinn. Leikurinn á móti Frökkum skiptir gríðarlegu máli fyrir okkur þar," sagði Eyjólfur.
Leikurinn gegn Frökkum er á Kópavogsvelli laugardaginn 5. september en leikurinn gegn Norður-Írum verður á Fylkisvelli þremur dögum síðar.
Hér að ofan má sjá viðtalið í heild sinni.
Athugasemdir