Eins og við sögðum frá í gær söfnuðu tveir ungir drengir, Tómas White og Dagur Hrafn 501 flöskum, að andvirði tæplega 8000 krónum og færðu félaginu. Með fylgdu skilaboð um að þeir vildu að peningurinn færi í orkudrykki og próteindrykki svo leikmennirnir verði betri inni á vellinum.

„Ég og Svavar vinur minn í Fitness sport vorum að lesa greinina um strákana sem söfnuðu fyrir próteini fyrir liðið og gátum ekki annað en lagt okkar að mörkum með því að færa þeim prótein úr Fitness sport," sagði Lúðvík, sem gengur undir gælunafninu Monaco kóngurinn, við Fótbolta.net.

Hann mætti á æfingu liðsins í gær með miklar byrgðir af próteini en Michael Præst fyrirliði Stjörnunnar tók við þessu öllu.

Lúðvík lék í nokkur ár með Stjörnunni á síðasta áratug síðustu aldar en hann lék þá við hlið Bjarna Benediktssonar fjármálaráðherra í hjarta varnarinnar.

Sjá einnig:
Söfnuðu flöskum til að gefa Stjörnumönnum prótein