Adam Örn Arnarson verður 21 árs gamall á morgun og hann ákvað að halda upp á afmælið snemma þegar lið hans Álasund mætti Sarpsborg 08 í norsku úrvalsdeildinni í dag.

Álasund lenti undir á 11. mínútu þegar Patrick Mortensen skoraði, en stuttu eftir það jafnaði Sondre Brunstad Fet eftir sendingu frá íslenska bakverðinum. Gestirnir frá Sarpsborg leiddu þó þegar dómarinn flautaði til leikhlés þar sem Pål Alexander Kirkevold skoraði á 24. mínútu.

Álasund þurfti virkilega að fá eitthvað út úr leiknum þar sem liðið er í mikilli fallbaráttu og þeim tókst ætlunarverk sitt. Aftur náði Adam Örn að leggja upp, en að þessu sinni var það fyrir varamanninn Franck Boli. Það reyndist síðasta mark leiksins og lokatölur því 2-2 jafntefli.

Hjá Álasundi kom Aron Elís Þrándarsson af bekknum á 62. mínútu, en á meðan var Daníel Leó Grétarsson allan tímann á bekknum. Bakvörðurinn Kristinn Jónsson var ekki í hóp hjá Sarpsborg 08 í dag.

Álasund er nú með 20 stig í næstneðsta sæti deildarinnar, en það er stutt á milli í fallbaráttunni. Sarpsborg 08 er með 36 stig í 4. sæti.