Heimild: mbl.is
Kristinn Jónsson.
Tilkynnt var í morgun að sóknarbakvörðurinn Kristinn Jónsson hefur samið við Sarpsborg sem hafnaði í ellefta sæti norsku úrvalsdeildarinnar á liðnu tímabili. Kristinn yfirgefur Breiðablik en hann var einn besti leikmaður Pepsi-deildarinnar í ár.
Í viðtali við vefsíðu Morgunblaðsins segir Kristinn að það hafi verið hans markmið að komast út síðan hann fór aftur í Breiðablik fyrir ári.
„Ég ræddi þessi mál eitthvað við landsliðsþjálfarana í sumar og það er alveg ljóst að maður þarf helst að vera að spila úti til að geta verið í hópnum sem fer á EM. Þetta skref hjá mér er fyrst og fremst tekið til að sýna sig og sanna í norsku úrvalsdeildinni, en það eykur líka líkurnar á að komast í EM-hópinn sem hlýtur að vera markmið allra íslenskra fótboltamanna í dag," segir Kristinn sem á fjóra A-landsleiki að baki.
Kristinn segir að hjá Sarpsborg sjái menn fyrir sér að taka skref upp á við og enda í 5. - 10. sæti næsta tímabil. Hann býst við að fá að taka virkan þátt í sóknarleiknum sem er hans helsta vopn en Sarpsborg spilar með tígulmiðju og því gott pláss fyrir bakverðina að koma fram.
„Þeir eru meðvitaðir um minn leikstíl. Þeir komu á leiki hjá mér í sumar og þekkja vel til minna styrkleika. Þjálfarinn talaði um það að hann vildi bakvörð sem gæti komið framar á völlinn, en einnig varist, sem hentar mér mjög vel."
Athugasemdir
