Dramatíkin var í hámarki í þeim leikjum sem hófust klukkan 15:00 í ensku úrvalsdeildinni. Þréttanda umferð ensku úrvalsdeildarinnar rúllar um helgina og þetta voru leikir í þeirri umferð.

Sjónvarpsleikurinn var á milli Liverpool og Sunderland, en eins og ráð var gert fyrir þá stjórnaði Liverpool leiknum. Þeir áttu hins vegar í erfiðleikum með að koma boltanum í netið, en það tókst loksins þegar korter var eftir af leiknum. Þá skoraði varamaðurinn Divock Origi og áður en leiknum lauk náði James Milner að bæta við marki úr vítaspyrnu.

Lokatölur á Anfield því 2-0 fyrir Liverpool sem eru komnir í toppsætið, allavega í bili. Það gengur hins vegar ekki jafnvel hjá David Moyes og hans mönnum í Sunderland, en þeir eru í fallsæti með átta stig.

Einhver ótrúlegasti leikur ensku úrvalsdeildarinnar frá upphafi, leyfi ég mér að fullyrða, átti sér stað á Liberty-vellinum í Wales í dag þegar Swansea og Crystal Palace mættust.

Crystal Palace komst yfir, en Gylfi Þór Sigurðsson jafnaði með marki úr aukaspyrnu. Staðan var 1-1 í hálfleik, en Hollendingurinn Leroy Fer setti tvö mörk um miðjan seinni hálfleikinn og kom Swansea í 3-1 og virtist vera að klára leikinn.

Svo var aldeilis ekki því gestirnir svöruðu með þremur mörkum og komust í 4-3. Þarna héldu margir að þetta væri búið, en svo var heldur ekki því Spánverjinn Fernando Llorente, sem hafði komið af bekknum, setti tvö mörk fyrir Swansea í uppbótartíma og tryggði þeim sigurinn á ótrúlegan hátt; lokatölur 5-4 fyrir Swanea í þessum ruglaða leik.

Hinir tveir leikirnir sem voru spilaðir á sama tíma enduðu í jafnteflum. Hull og West Brom gerðu 1-1 jafntefli og Leicester og Middlesbrough skildu jöfn, 2-2, þar sem jöfnunarmark Englandsmeistara Leicester kom úr vítaspyrnu í uppbótartíma.