Heimild: Guardian
Forsvarsmenn enska liðsins Crewe vissu á ákveðnum tímapunkti að Barry Bennell, fyrrum barna- og unglingaþjálfari hjá félaginu, hafði verið sakaður um kynferðislega misnotkun. Bennell hélt engu að síður áfram að þjálfa liðið árum saman, en þetta hefur Guardian eftir fyrrum stjórnarmanni félagsins.
Nokkrir fyrrum fótboltamenn hafa stigið upp á undanförnum dögum og tilkynnt um kynferðislega misnotkun af þjálfurum í yngri flokkum, en Bennell hefur verið miðpunkturinn í öllu þessu. Hann fékk fjögurra ára dóm fyrir að nauðga breskum strák í fótboltaferð í Flórída 1994 og svo níu ára dóm fyrir 23 brot gegn sex strákum á Englandi 1998. Honum var svo stungið í fangelsi í þriðja sinn í fyrra er hann játaði að hafa beitt dreng ofbeldi í fótboltabúðum árið 1980.
Hamilton Smith, sem var í nokkur ár í stjórn Crewe, segir að það hafi verið mikið rætt um að reka Bennell á sínum tíma, en ekki hafi fundist nægar sannanir fyrir því sem hann hafi átt að sök. Hann segist vera reiður yfir stöðunni núna.
„Ég er ótrúlega reiður að félagið skyldi vísa þessum ásökunum um Bennell á bug," sagði Smith. „Þetta var rætt á efsta stigi félagsins og, eins mikið og ég reyndi að leysa þetta, þá gat ég það því miður ekki. Ég hræðist að hugsa um það hversu mörg fórnarlömb það eru."
Andy Woodward var sá fyrsti sem steig fram. Hann sagði frá því að þegar hann var barn hefði Bennell beitt sig grófu ofbeldi. Í gær komu svo tveir fyrrum fótboltamenn til viðbótar, Chris Unsworth og Jason Dunford, fram opinberlega og sögðu frá sinni reynslu. Unsworth segist aldrei hafa sagt nokkrum manni frá ofbeldinu fyrr en nú, en Bennell nauðgaði honum allt að hundrað sinnum.
Forsvarsmenn ensku úrvalsdeildarinnar hafa lýst yfir áhyggjum af ásökununum og hafa hvatt alla sem búa yfir upplýsingum til að gefa sig fram. Þá hafa barnaverndarsamtökin NSPCC virkjað sérstaka neyðarlína fyrir fórnarlömb eftir að misnotkunin var gerð opinber.
Athugasemdir