Spænska stórveldið Real Madrid lenti í vandræðum með botnbaráttulið Sporting Gijon í spænsku úrvalsdeildinni. Madrídingar gátu náð sjö stiga forskoti með sigri.

Risarnir úr höfuðborginni mættu miklu sterkari til leiks og svo virtist sem þeir ætluðu að rúlla yfir Sporting Gijon. Cristiano Ronaldo setti tvö mörk snemma leiks, en gestirnir náðu að minnka muninn á 35. mínútu með marki frá Carlos Carmona.

Staðan var 2-1 í hálfleik fyrir Real Madrid, en í seinni hálfleiknum fengu gestirnir dauðafæri til þess að jafna þegar þeir fengu vítaspyrnu. Á punktinn fór hinn króatíski Duje Cop, en hann skaut boltanum í slána.

Lokatölur urðu því 2-1 fyrir Real Madrid sem er núna með sjö stiga forskot á toppi spænsku deildarinnar. Sporting Gijon er í 18. sæti með níu stig.

Það er hægt að sjá stöðutöfluna í deildinni hér að neðan, en það gæti tekið smá tíma fyrir hana að uppfæra sig.