Fótbolta.net mótið: Blikar unnu Ólafsvíkinga

Pepsi-deildarliðin Breiðablik og Víkingur Ólafsvík mættust í Kórnum í morgun. Um var að ræða síðasta leikinn í riðlakeppni Fótbolta.net mótsins.

Víkingur Ólafsvík spilaði með þrjá erlenda leikmenn sem eru hjá félaginu á reynslu. Um var að ræða markvörð, miðvörð og bakvörð.

Fyrir leik var ljóst að Víkingar myndu enda í neðsta sæti og Blikar í því efsta en Kópavogsliðið mætir Keflavík í úrslitaleik næsta laugardag.

Árni Vilhjálmsson er sjóðandi heitur um þessar mundir og skoraði annað markið í leiknum í dag en hitt gerði varnarmaðurinn Þórður Steinar Hreiðarsson eftir hornspyrnu.