„Vonir mínar eru þær að byrja mótið af krafti og gera heimavöllinn okkar sterkan. Það hefur vantað undanfarin ár hjá Val. Það er góð byrjun. Þó það sé draumur allra að lyfta bikurum verðum við að líta raunsætt á þetta," segir Haukur Páll Sigurðsson, fyrirliði Vals.
„Ef við byrjum sumarið vel getur það gert ýmislegt og fengið sjálfstraust í mannskapinn."
Haukur var í viðtali í útvarpsþættinum Fótbolti.net á laugardaginn og var meðal annars spurður út í Patrick Pedersen sem á að skora mörkin fyrir Val.
„Við bindum vonir við Patrick. Hann er búinn að skora fullt af mörkum fyrir okkur en var óheppinn með meiðsli síðasta sumar. Það var mikill missir fyrir okkur í fyrra og vonandi heldur hann áfram að skora eins og hann hefur verið að gera í vetur."
Flestir tala um Stjörnuna, FH og KR þegar rætt er um Íslandsmeistaraefni sumarsins.
„Þessi þrjú lið eru með stærstu leikmannahópana. Þeir hafa styrkt sig vel í sumar með góðum útlendingum," segir Haukur en Valur á fyrsta leik gegn nýliðum Leiknis á sunnudag.
„Það er frábært að fá Leikni upp, félag sem er að skrifa sögu sína. Kjarninn er uppaldir Leiknismenn sem er erfitt að spila gegn. Það hefur einkennt Leiknisliðið undanfarin ár að það er erfitt að keppa gegn þeim. Þetta verður hörkuleikur."
Viðtalið má heyra í heild sinni í spilaranum hér að ofan.
Athugasemdir