Pepsi-deild kvenna er farin á fullt og fóru þrír leikir fram í kvöld.

Íslandsmeistarar Stjörnunnar heimsóttu nýliða Hauka á Ásvöllum. Guðmunda Brynja Óladóttir kom Stjörnukonum yfir strax á 9. mínútu eftir hornspyrnu Kristrúnar Kristjánsdóttur.

Tíu mínútum síðar fékk Sunna Líf Þorbjörnsdóttir rautt spjald eftir að hafa varið boltann með höndunum inn í vítateig Hauka og vítaspyrna dæmd. Úr vítaspyrnunni skoraði Katrín Ásbjörnsdóttir. Haukakonur gáfust hins vegar ekki upp og undir lok fyrri hálfleiks skoraði Vienna Behnke.

Á 78. mínútu skoraði Katrín þriðja mark Stjörnunnar og annað mark sitt og sex mínútum síðar bætti Guðmunda við sínu öðru marki og fjórða marki Stjörnunnar. Írunn Þorbjörg Aradóttir skoraði svo fimmta markið á lokamínútum leiksins. Lokatölur 5-1 og Íslandsmeistararnir byrja vel.

Í Kópavogi mættust Breiðablik og FH. Eftir markalausan fyrri hálfleik skoraði Rakel Hönnudóttir. Ingibjörg Sigurðardóttir fékk svo að líta á rauða spjaldið á 71. mínútu. FH-ingar náðu ekki að nýta sér liðsmuninn og vann Breiðablik 1-0.

Fylkir fékk nýliða Grindavíkur í heimsókn. Jasmín Erla Ingadóttir skoraði eina mark leiksins og tryggði Fylkiskonum sigurinn. Báðum liðum er spáð í neðri hlutanum og því mikilvægur sigur hjá Fylki.