Lestu um leikinn: HK 2 -  1 Leiknir R.

„Við áttum alveg möguleika á að skora fleiri mörk en það sem skiptir sköpum er losarabragur í varnarleiknum í fyrri hálfleiknum. Við vorum ekki nægilega samstilltir og tókum ekki á skarið þar," segir Kristján.

Halldór Kristinn Halldórsson var ekki með í leiknum í kvöld vegna meiðsla og var hans sárt saknað í vörn Leiknis.

„Þegar vantar lykilmenn er erfitt að fylla skörð þeirra. Það er erfitt að standa af sér allar tæklingar og hann var bólginn eftir Akureyri. Ég vona að hann verði tilbúinn í næsta leik."

Leiknismenn voru allt annað en sáttir við að fá ekki vítaspyrnu í uppbótartíma þegar brotið var á Óttari Bjarna í teignum.

„Hann rífur í hann þegar hann er í skotinu. Það sést langar leiðir."

Strax eftir það fær Óttar Bjarni á sig aukaspyrnu og annað gult spjald, fyrra gula kom eftir mótmæli þegar Helgi Mikael dómari dæmdi ekki víti.

„HK-ingurinn hreinlega hoppar á hann og hendir sér niður. Það er eins og aðstoðardómarinn hafi dæmt þetta. Þetta var léleg dómgæsla. Dómararnir misstu hausinn og þoldu ekki pirringinn, hávaðann og lætin í leiknum."

Viðtalið má sjá í heild sinni í sjónvarpinu hér að ofan.