Heimild: Morgunblaðið
Sara Björk er lykilmaður í íslenska landsliðinu
Landsliðskonan Sara Björk Gunnarsdóttir skipti um lið í sumar. Eftir fimm ár í Svíþjóð með Rosengård ákvað Sara að skrifa undir tveggja ára samning við þýska stórliðið Wolfsburg. Lið Wolfsburg er eitt allra besta lið Evrópu, en liðið hafnaði í 2. sæti þýsku úrvalsdeildarinnar á síðasta leiktímabili og komst í úrslitaleik Meistaradeildarinnar þar sem liðið tapaði gegn Lyon.
Sara Björk, sem var í 19-23. sæti yfir bestu knattspyrnukonur Evrópu á tímabilinu 2015–2016, segir að sér lítist vel á aðstæður hjá Wolfsburg en keppni í þýsku deildinni hefst eftir viku.
„Þetta er allt mjög fagmannlegt. Hópurinn er tiltölulega nýkominn allur saman en það voru níu leikmenn á Ólympíuleikunum. Við erum með 25 manna hóp, sem er ólíkt því sem ég hef vanist þar sem við höfum haft 11-14 leikmenn í fínu standi," sagði Sara í samtali við Morgunblaðið.
Sara býst við mjög harðri samkeppni um sæti í byrjunarliðinu í Þýskalandi.
„Ég hugsa að mér verði spilað sem sexu á miðjunni og það eru fjórir leikmenn í þeirri stöðu. Það er því mikil samkeppni og þetta eru allt gæðaleikmenn. Það er ástæðan fyrir því að ég kom hingað. Ég vil fá mikla samkeppni, ég vil að þetta sé krefjandi og þetta er búið að standa undir því."
„Við höfum æft eins og brjálæðingar á undirbúningstímabilinu. Reyndar er undirbúningstímabilið búið að vera mjög stutt miðað við það sem ég er vön. Í Svíþjóð voru þetta þrír mánuðir en hér eru það sex vikur. Hér er æft mjög vel í sex vikur og það er mjög erfitt. Síðan byrjar tímabilið og þá verður það aðeins minna," segir Sara við Morgunblaðið í dag.
Athugasemdir
