Landsliðsmaðurinn Birkir Már Sævarsson leikur með Brann og var hann skiljanlega í slæmu skapi þegar norskir fjölmiðlar ræddu við hann eftir leik.

„Þetta er hrikalegt og í raun ekki mikið meira að segja," segir Birkir sem var spurður að því hvort þetta væri versta stund sem hann hefur upplifað á ferlinum?

„Já án nokkurs vafa. Við vorum einfaldlega lélegir. Það var augljóst að menn fóru á taugum meðan leikurinn stóð yfir."

Birkir á förum
Allt bendir til þess að þetta hafi verið síðasti leikur Birkis fyrir Brann. Hann vildi lítið gefa upp við norska fjölmiðla annað en að hann gæti verið á förum. Birkir hefur sterklega verið orðaður við Hammarby í Svíþjóð.

„Þetta kemur í ljós í næstu viku. Það er ekki hægt að segja meira á þessari stundu. Það er mjög sorglegt að enda tímabilið á þessum nótum. Ég ber sterkar taugar til Brann og liðið átti aldrei að falla. En það var ekki þessi leikur sem felldi okkur," segir Birkir.

Íslendingur til Mjöndalen?
Hinsvegar er Mjöndalen þegar farið að undirbúa veru sína í efstu deild. Vegard Hansen, þjálfari liðsins, segist meðal annars horfa til Íslands í leit að styrkingu.

„Við höfum verið með augun á leikmönnum í Svíþjóð og á Íslandi í nokkurn tíma og þekkjum markaðinn þar nokkuð vel. Það á ekki að koma neinum á óvart þó íslenskir eða sænskir leikmenn komi til okkar," segir Hansen við norska fjölmiðla.