West Ham fékk Crystal Palace í heimsókn á Boleyn Ground í fyrsta leik dagsins í enska boltanum. Alan Pardew mætti á sinn gamla heimavöll og vonaðist til að halda áfram góðu gengi á útivöllum en Crystal Palace hefur ekki tapað útileik síðan hann tók við liðinu í byrjun árs.

Glenn Murray var í fremstu víglínu hjá Palace og hann kom gestunum yfir á 41.mínútu. Réttast væri þó að skrá markið sem sjálfsmark hjá Aaron Cresswell en hreinsun hans misheppnaðist hrapallega og endaði í markinu.

Gestirnir mættu mun grimmari út í seinni hálfleikinn og Scott Dann tvöfaldaði forystuna á 51.mínútu. Glenn Murray var svo aftur í sviðsljósinu eftir rúmlega klukkutíma leik þegar hann kom Crystal Palace í 3-0. Nokkrum mínútum síðar fékk títtnefndur Murray sitt annað gula spjald og þar með rautt.

West Ham efldust í kjölfarið og pressuðu stíft. Enner Valencia minnkaði muninn á 76.mínútu en nær komust West Ham ekki og verðskuldaður sigur Crystal Palace staðreynd. West Ham aðeins unnið einn deildarleik á þessu ári og fjarlægist evrópudraumur Hamranna með hverjum leiknum.