„Nei, við höfum misst marga góða leikmenn frá síðasta tímabili og Sindra-liðið er mjög ungt. Þar af leiðandi kemur þessi spá ekkert á óvart," segir Auðun en markmið Sindramanna númer eitt er skýrt.

„Við ætlum okkur að gera betur en í fyrra. Það er aðalmarkmiðið."

Sindri hafnaði í áttunda sæti í fyrra og hyggst liðið styrkja sig fyrir komandi tímabil.

„Já, við eigum von á tveimur erlendum leikmönnum í byrjun maí," segir Auðun en hvernig er fótboltaáhuginn á Höfn í Hornafirði?

„Áhuginn mætti vera meiri en þetta helst oftast í hendur við árangur liðsins og spilamennsku. Við þurfum að byrja á því að spila skemmtilegan fótbolta og vinna leiki. Þá munu Hornfirðingar fjölmenna á völlinn," segir Auðun.

Hvernig heldur hann að deildin í heild muni spilast?

„Ég á von á skemmtilegri og spennandi deild eins og í fyrra. Fyrirfram geri ég ráð fyrir ÍR, KV, Gróttu og Aftureldingu í fyrstu fjórum sætunum. Hin liðin eru nokkuð jöfn og munu eflaust reita stig af hvort öðru."