Dele Alli var valinn besti ungi leikmaður tímabilsins.
Dele Alli, miðjumaður Tottenham, hefur samþykkt ákæru enska knattspyrnusambandsins um ofbeldisfulla hegðun þegar hann kýldi Claudio Yacob, leikmann West Brom, í magann í miðjum leik á mánudag.
Allt bendir til þess að hann fari í þriggja leikja bann og spili því ekki meira á tímabilinu.
Atvikið var ekki í skýrslu dómara en náðist á myndbandsupptöku og var tekið fyrir af aganefnd.
Alli er tvítugur og var daginn fyrir leikinn útnefndur besti ungi leikmaður ársins í deildinni.
Tottenham er sjö stigum á eftir toppliði Leicester þegar þrír leikir eru eftir. Leicester getur innsiglað titilinn með sigri gegn Manchester United á sunnudag.
Uppfært 16:30: Staðfest hefur verið að Dele Alli mun fara í þriggja leikja bann og tekur því ekki frekari þátt þetta tímabilið.
Athugasemdir
