Núna er fótboltasumarið loksins farið á fullt! Pepsi-deild kvenna hófst í gær og Pepsi-deild karla verður flautuð af stað á sunnudag.

Sjá einnig:
Misstir þú af einhverju í upphitun fyrir Pepsi-deildina?

Fyrsta umferð Pepsi-deildar kvenna lýkur í kvöld en þá heimsækir KR eyjuna fögru og mætir ÍBV á Hásteinsvelli.

Borgunarbikar karla heldur áfram en 2. umferðin hefst í kvöld með þremur leikjum. Inkasso-deildar liðin HK og Fram mætast í Kórnum og Selfoss fær Kormák/Hvöt í heimsókn. Þá verður suðurnesjaslagur er Keflavík mætir Víði úr Garði.

Bikarinn heldur áfram á morgun og sunnudag og þá er einnig spilað í C-deild Lengjubikars kvenna um helgina.

Eftir rúmlega sex mánuða undirbúningstímabil verður loksins flautað til leiks í Pepsi-deild karla en á sunnudag fara fram þrír leikir. ÍBV fær Fjölni í heimsókn og þá hefja Íslandsmeistarar FH titilvörn sína upp á Akranesi, þar sem ÍA mun bíða þeirra. Í lokaleik kvöldsins mætast Valur og Víkingur Ólafsvík.