Knattspyrnuskóli Barcelona fyrir stráka og stelpur á Íslandi í sumar
Í annað sinn býður Barcelona í samvinnu við Knattspyrnuakademíu Íslands upp á æfingabúðir hér á Íslandi.
„Í fyrra valdi FCB, eitt öflugasta íþróttafélag heims, Ísland til að bjóða eingöngu stúlkum, í fyrsta sinn, upp á æfingabúðir þar sem reyndir þjálfarar félagsins þjálfuðu þátttakendur eftir hinu fræga æfingakerfi Barça og miðluðu um leið þekkingu sinni til íslenskra þjálfara," segir í fréttatilkynningu.
„Gerður var góður rómur að æfingabúðunum og bæði þátttakendur og foreldrar þeirra lýstu yfir mikilli ánægju."
„Nú hefur FC Barcelona, í samvinnu við Knattspyrnuakademíu Íslands, ákveðið að bjóða einnig upp á æfingabúðir fyirr íslenska pilta á aldrinum 10-16 ára."
„Æfingabúðirnar verða á Valsvellinum dagana 18.-22. júní fyrir pilta og 24.-28. júní fyrir stúlkur. Þeim lýkur með hófi þar sem góðir gestir frá Barcelona mæta."
Skráning í æfingabúðirnar, sem ætlaðar eru börnum á aldrinum 10-16 ára, hefst föstudaginn 28. apríl kl. 10:00. Reiknað er með að færri komist að en vilja og þess vegna eru forráðamenn hvattir til að skrá börnin sín sem fyrst á skráningarsíðu Knattspyrnuakademíu Íslands.
Allir þátttakendur munu fá til eignar Nike æfingagalla og fótbolta.
Athugasemdir