Didier Deschamps, landsliðsþjálfari Frakka, mun leggja fram lögsókn gegn Eric Cantona, fyrrum samherja sínum hjá franska landsliðinu, vegna ummæla sem Cantona lét út úr sér um landsliðsval Frakka.
Cantona gaf það í skyn að kynþættir hafi verið í huga Deschamps í landsliðsvali Frakka fyrir EM í sumar. Það er Deschamps ekki sáttur með og hyggst lögsækja Cantona.
Deschamps og Cantona spiluðu 34 sinnum saman með franska landsliðinu, en mikil illindi hafa verið á milli þeirra síðan Deschamps tók við af Cantona sem fyrirliði Frakka. Deschamps leiddi Frakka síðan til sigurs á Heimsmeistaramótinu árið 1998 og Evrópumótinu árið 2000.
„Ég mun fara með þetta mál fyrir dómstóla fyrir hönd Deschamps. Ummæli Cantona voru niðrandi og ærumeiðandi. Cantona virti að vettugi heiðarleika Deschamps og verðskuldar af þeim sökum refsingu," sagði Carlos Brusa, lögmaður Didier Deschamps, í viðtali við franska blaðið L'Equipe.
Cantona var ósáttur með það að leikmenn eins og Hatem Ben Arfa og Karim Benzema væru ekki í hópnum hjá Frökkum og sagði ástæðuna fyrir því vera sú að þeir leikmenn væru af erlendum uppruna. Þó vekur athygli að fjöldi leikmanna í hópnum er af erlendu bergi brotinn og þá kallaði Deschamps, Adil Rami, sem er af marakóskum uppruna, inn í hópinn fyrir Rapahel Varane sem er meiddur.
Sjá einnig:
Cantona sakar Deschamps um fordóma í garð leikmanna
Athugasemdir