"Þetta eru gríðarleg vonbrigði. Við ætluðum að ná í þrjú stig og vorum tíu sekúndum frá því. Það eru auðvitað vonbrigði," sagði Eiður Benedikt Eiríksson, þjálfari Fylkis, eftir 1-1 jafntefli gegn ÍA í Pepsídeild kvenna í dag.
Lestu um leikinn: Fylkir 1 - 1 ÍA
"Við hleyptum þeim óþarflega inn í þetta enda áttum við að klára leikinn í fyrri hálfleik. Í seinni hálfleik vorum við svo að spila gegn liði sem hafði engu að tapa og fór 100% í öll návígi. Það varð okkur að falli."
Þá segir Eiður að leikurinn hafi ekki verið mikið fyrir augað. "Þetta var frekar leiðinlegur leikur. Ef ég hefði verið áhorfandi hefði ég ekki fengið mikið fyrir peninginn."
Þó svo að Fylkisliðið sé enn án sigurs eftir fjóra leiki segist Eiður ekki vera farinn að hafa stórar áhyggjur.
"Nei ekki þannig. Það er auðvitað bara pirrandi. Þrjú jafntefli telja jafnmikið og einn sigur. Þetta er ömurlegt en við þurfum bara að setja meiri kraft í þetta."
Hann segir líka mikilvægt að fara að nýta heimavöllinn betur. "Þrír leikir á heimavelli og tvö stig. Það er ekki nógu gott."
Athugasemdir