Hlynur og Blikastúlkur eru komin í undanúrslit
Hlynur Svan stýrði liði sínu til sigurs gegn Val í dag og Breiðablik verður því í pottinum þegar dregið verður í undanúrslit bikarsins.
„Þetta var bara mjög góður leikur af okkar hálfu. Það sem við lögðum upp með fyrir leik gekk fullkomlega upp í fyrri hálfleik. Svo náttúrulega opnaðist leikurinn. Við erum 2-0 yfir og þetta er bikarleikur svo við vissum alveg þær myndu þurfa að koma ansi hátt á okkur sem þær gerðu. Þar af leiðandi fengum við aragrúa af þremur á móti tveimur, fjórum á móti þremur þar sem við vorum að velja svolítið vitlaust í lokin. Annars hefðum við bara labbað hérna í gegn og komist ein á móti markmanni trekk í trekk,“ sagði Hlynur um leikinn.
„Ég er mjög sáttur. Það svosem skiptir ekki máli hvort við vinnum 3-0 eða bara 1-0. Við erum áfram í hattinum þegar það verður dregið á mánudaginn. Við ætluðum okkur allan tímann að fara í undanúrslit.“
Aðspurður um óskamótherja í undanúrslitum sagðist Hlynur helst vilja heimaleik en að hann yrði einnig sáttur við útileik á gervigrasi Stjörnunnar.
„Þetta verða fjögur góð lið í hattinum þegar það verður dregið og það væri gaman að fá heimaleik. Ég held að það skipti svolítið miklu máli að fá heimaleik. Svo hefur okkur reyndar gengið mjög vel á gervigrasi þannig að ef að við drögumst úti á móti Stjörnunni þá þiggjum við það alveg. Ég held að við séum með svona ekta gervigraslið.“
„Við unnum þennan titil í fyrra og ætlum að halda honum í Kópavogi í ár“, sagði Hlynur brattur að lokum.
