Keflvíkingar hafa komist að samkomulagi um starfslok við markvörðinn Richard Arends og varnarmanninn Kiko Insa. Þetta kom fram í Akraborginni á X-inu í dag.
„Þetta eru atvinnumenn í fótbolta og þeir skildu stöðuna," sagði Haukur Ingi Guðnason annar af þjálfurum Keflvíkinga í Akraborginni.
Arends er hollenskur markvörður sem kom til Keflvíkinga fyrir mót.
„Hann er mun betri markmaður en hann hefur sýnt en það hefur ekki fallið í það horf sem hann og klúbburinn hefði óskað," sagði Haukur Ingi.
Hinn 18 ára gamli Sindri Kristinn Ólafsson mun standa á milli stanganna gegn FH í kvöld en hann hefur spilað fimm leiki í sumar.
Insa hefur leikið sjö leiki í Pepsi-deildinni en síðasti leikur hans var gegn Val 14. júní þar sem hann skoraði sjálfsmark.
Insa er frá Spáni en hann lék áður með Víkingi Ólafsvík í Pepsi-deildinni árið 2013.
Keflvíkingar hafa fengið þrjá nýja erlenda leikmenn í þessum mánuði en það eru þeir Chukwudi Chijindu, Martin Hummervoll og Paul Bignot en þeir verða allir með gegn FH í kvöld.
Athugasemdir