Toppbaráttulið Grindavíkur gerði 2-2 jafntefli við fallbaráttulið Hugins í kvöld en gestirnir frá Seyðisfirði voru með forystuna í rúma klukkustund og kom jöfnunarmark Grindvíkinga ekki fyrr en á lokasekúndum uppbótartímans.
Óli Stefán Flóventsson, þjálfari Grindavíkur, var sáttur með stigið að leikslokum, sérstaklega í ljósi þess að hin toppbaráttuliðin töpuðu sínum leikjum.
Óli Stefán Flóventsson, þjálfari Grindavíkur, var sáttur með stigið að leikslokum, sérstaklega í ljósi þess að hin toppbaráttuliðin töpuðu sínum leikjum.
„Við gerðum þetta eitthvað svo ótrúlega erfitt fyrir okkur. Þessi dagur er bara, frestunin og allt við þetta var bara svo skrítið að ég hef sjaldan upplifað annað eins. Sem betur fer náðum við þessu stigi á endanum," sagði Óli Stefán að leikslokum.
„Við erum ekki ennþá búnir að tapa hérna heima og eins og ég segi þá verð ég að fagna þessu stigi, úr því sem komið var."
Grindvíkingar áttu rúmlega 30 skot í leiknum og segist Óli Stefán sjaldan hafa upplifað jafn furðulegan leik.
„Mér fannst leikurinn svo skrítinn. Við spiluðum vel og vorum alltaf að sækja en svo kemur mjög ódýr aukaspyrna, þeir refsa og svo missum við boltann og þeir negla honum upp í skeytin. Við höldum áfram að sækja, komumst í gegn, fáum víti og ég veit ekki hvað og hvað, ég hef sjaldan upplifað svona leik, þetta var með ólíkindum."
Athugasemdir
